Mae’r gyli ar gyfer cerbyd trydan 'wedi newid ein bywydau' – sut y trodd teulu o Lanelli at drydan

Newid i gerbyd trydan

Fe wnaeth y teulu Francis newid i gerbyd trydan dros flwyddyn yn ôl gyda chymorth gyli sydd wedi'i osod y tu allan i'w cartref yn Llanelli. Mae'r gyli – sef rhych syml yn y palmant wedi'i gerfio gan beirianwyr - yn golygu y gallant redeg eu cebl gwefru yn ddiogel heb achosi perygl o faglu.

Roedd gan y teulu gar diesel ond roedd ganddyn nhw ddiddordeb mewn mynd am un trydan, felly fe wnaethon nhw gysylltu â chyngor Sir Gaerfyrddin i ofyn a allen nhw osod gwefrwr ar ochr y ffordd. Nid yw eu dreif yn ddigon llydan ar gyfer car ac roedd ei angen er mwyn hygyrchedd ar gyfer cadair olwyn Lauren.

Treial gwefru cerbydau trydan Cyngor Sir Gaerfyrddin

Mae cyngor Sir Gaerfyrddin yn rhan o dreial gwefru cerbydau trydan gartref, gyda'r nod o gefnogi preswylwyr sy’n methu â pharcio oddi ar y stryd. Fel rhan o'r treial, gosodwyd gyli Kerbocharge a gwefrwr awyr agored am ddim, gan alluogi’r teulu Francis i gael fan drydan Vauxhall Vivaro y maent bellach yn gyfarwydd â hi ac yn hoff iawn ohoni.

Sut mae'r treial wedi newid bywyd bob dydd

"Mae wedi bod mor wych cael y cerbyd yna - gallaf ei barcio y tu allan i'r tŷ, gallaf ei gysylltu’n hawdd i’w wefru dros nos ac mae’n barod i fynd yn y bore," meddai Lauren.

Mae'r gyli wedi'i guddio, meddai Lauren. "Mae'n ddyluniad da iawn. Rwy'n gobeithio y bydd pobl yn gyrru heibio i'n tŷ ac yn meddwl, 'does ganddyn nhw ddim dreif, sut maen nhw'n gwefru?' Yna efallai y byddan nhw'n dweud “wel mae ganddyn nhw un – a allwn ni gael un?"

Mae'r cwpl wedi archebu dyfais gan Kerbocharge i alluogi Lauren i gysylltu’r fan heb orfod plygu i lawr i roi'r cebl yn y gyli. Maen nhw'n edrych ymlaen at glywed sut mae'r treial wedi llwyddo yn y sir, gan fod eu profiad wedi bod mor gadarnhaol.

Manteision newid i gerbyd trydan

Eglurodd Gregg bod y cerbyd trydan wedi ymdoddi'n ddi-dor i deithiau a ffyrdd o fyw dyddiol y teulu.

Meddai Lauren, "Mae'n golygu nad oes rhaid i Lauren stopio mewn gorsafoedd tanwydd gyda'r plant a mynd â nhw allan o'r car i fynd i dalu. Nid yw pob gwefrwr cyhoeddus yn hygyrch, felly rydyn ni'n ei wefru yma. Mae'r gwahaniaeth mewn pris yn enfawr o’i gymharu â’r hyn yr oeddem yn ei dalu am diesel."

"Mae'r fan yn llythrennol fel fy esgidiau - allaf i ddim mynd i unrhyw le hebddi. Mae wedi bod mor dda, mae wedi newid ein bywydau yn llwyr a sut rydyn ni'n meddwl am ein teithiau. Mae'n rhaid i ni stopio beth bynnag i gymryd seibiannau, felly does dim ots gennym ni ei gwefru yn ystod y daith.

"Ein nod oedd cyrraedd fy rhieni yn y gogledd heb orfod gwefru a gallwn ni wneud hynny – buom ni yn Ffrainc sawl tro."

Hyd yn oed gyda dau oedolyn, dau blentyn, seddi car a chadair olwyn yn llenwi'r fan, bydd y cerbyd yn dal i gyflawni teithiau i Gaerdydd a Dinbych-y-pysgod ac yn ôl ar un gwefriad.

Dysgwch fwy

Dysgwch fwy am newid i gerbyd trydan a darllen tips Autotrader ar gyfer dewis y cerbyd trydan ail-law cywir i chi.