Gwybodaeth am y Gronfa Sgyrsiau am yr Hinsawdd

Gall mudiadau sydd â chysylltiadau â chymunedau wneud cais am gyllid i gynnal digwyddiadau lleol. Nod y gronfa yw casglu tystiolaeth a syniadau gan y cyhoedd. Bydd yr wybodaeth hon wedyn yn llywio proses gwneud penderfyniadau Llywodraeth Cymru am y newid yn yr hinsawdd.

Bydd gofyn i ymgeiswyr llwyddiannus ateb cyfres o gwestiynau penodol gyda chyfranogwyr. Bydd y rhain yn gysylltiedig ag un neu fwy o'r pynciau canlynol:

• Tai

• Trafnidiaeth

• Amaethyddiaeth a defnydd tir

Bydd eich sylwadau yn helpu i lywio penderfyniadau Llywodraeth Cymru. Bydd hyn yn sicrhau tegwch ac yn helpu i ddatgloi manteision newid i bawb. Rhoddir blaenoriaeth i ddigwyddiadau sy'n ymgysylltu â grwpiau a ymyleiddiwyd.

Mae Llywodraeth Cymru eisiau clywed gan gynifer o bobl â phosibl. Mae hyn yn cynnwys y canlynol:

• Sefydliadau yn y sector cyhoeddus a'r sector preifat

• Sefydliadau addysg

• Sefydliadau trydydd sector

• Grwpiau cymunedol

• Aelodau o'r cyhoedd, yn enwedig y rheini y bydd hyn yn cael effaith anghymesur arnynt. E.e. pobl ifanc, pobl hŷn, y rheini sydd â phrofiadau bywyd ac o gefndiroedd amrywiol.

I fod yn gymwys i gael cyllid, rhaid i'ch digwyddiad ymwneud ag o leiaf un o'r tair thema. Bydd angen i'r rhai sy'n bresennol ateb cwestiynau penodol (wedi'u cynnwys yn eich pecyn trefnydd). Rhaid i chi hefyd rannu sylwadau ac adborth ar ffurflen werthuso ar ôl y digwyddiad. Bydd hyn yn helpu i lywio penderfyniadau Llywodraeth Cymru yn y dyfodol.

Bydd digwyddiadau'r Gronfa Sgyrsiau Cymunedol yn dechrau ar ôl Wythnos Hinsawdd Cymru, ac yn para tan ddiwedd mis Chwefror. Byddant yn adeiladu ar dri gweithdy rhanbarthol, gwahoddiad yn unig, a gynhelir yn ystod y brif wythnos. I gael rhagor o wybodaeth am y gweithdai rhanbarthol gwahoddiad yn unig, cliciwch yma.