Cynllun Benthyciadau Amaethyddiaeth Gynaliadwy: Cymorth newydd i ffermydd Cymru

Beth yw'r Cynllun Benthyciadau Amaethyddiaeth Gynaliadwy?

Mae'r Cynllun Benthyciadau Amaethyddiaeth Gynaliadwy yn cynnig cyllid fforddiadwy ar gyfer prosiectau sy'n gwella cynhyrchiant a chynaliadwyedd i fusnesau ffermio yng Nghymru.

Nod y cynllun yw helpu ffermwyr i wneud gwelliannau a allai leihau costau, cynyddu effeithlonrwydd a chefnogi ffyrdd mwy cynaliadwy o weithio. Datblygwyd y cynllun mewn ymateb i rai o'r heriau sy'n wynebu'r sector ffermio, gan gynnwys biliau ynni yn codi, costau cynyddol a'r angen i gynllunio ar gyfer y dyfodol.

Bydd y peilot yn rhedeg am flwyddyn ac yn helpu i asesu'r galw am y math hwn o gymorth.

Pa gyllid sydd ar gael?

Gall ffermydd cymwys wneud cais am fenthyciadau rhwng £25,001 a £1 miliwn. Mae gan y benthyciadau gyfradd llog sefydlog o 3% a gellir eu had-dalu dros gyfnod o hyd at 15 mlynedd, gan helpu busnesau i ledaenu cost buddsoddiadau mwy o faint.

Mae'r cynllun hefyd yn cynnwys chwe mis o wyliau ad-dalu, gan roi amser i fusnesau roi eu cynlluniau ar waith cyn i’r ad-daliadau ddechrau.

Ar gyfer beth y gellir defnyddio'r cyllid?

Gellir defnyddio cyllid ar gyfer prosiectau:

• Gwella effeithlonrwydd ynni

• Gosod systemau ynni adnewyddadwy

• Rheoli gwastraff a maetholion yn well

• Uwchraddio seilwaith ac offer fferm

Y nod yw helpu ffermydd i leihau costau, gwella effeithlonrwydd a buddsoddi yn eu dyfodol hirdymor.

Pwy all wneud cais?

Mae'r cynllun yn agored i fusnesau ffermio cymwys yng Nghymru. Rhaid i ymgeiswyr fod yn cyflawni gweithgareddau amaethyddol ar dir yng Nghymru a bodloni gofynion isafswm daliad tir neu lafur.

Mwy o wybodaeth

Gall busnesau fferm ddod o hyd i ragor o fanylion, gan gynnwys meini prawf cymhwysedd a sut i wneud cais drwy Fanc Datblygu Cymru.

Gall y Banc Datblygu hefyd roi cyngor ar opsiynau cyllid busnes ac amaethyddiaeth ehangach.