Clybiau ceir trydan yng Nghymru: Rhentwch gar trydan o £2 yr awr gyda TrydaNi

Beth yw TrydaNi?

Mae TrydaNi yn rhoi mynediad i bobl i gar trydan a rennir heb orfod prynu neu lesio un.

Mae gan bob clwb ceir un neu fwy o gerbydau trydan wedi'i barcio mewn lleoliad penodol, fel maes parcio yng nghanol y dref. Mae aelodau'n archebu car pan fydd ei angen arnynt, ei yrru a'i ddychwelyd i'w leoliad cartref ar gyfer y person nesaf.

Mae TrydaNi yn gofalu am y costau yswiriant, gwasanaethu a chostau rhedeg eraill. Mae trydan ar gyfer y 100 milltir cyntaf hefyd wedi'i gynnwys yn y pris.

Gallai TrydaNi fod yn ddefnyddiol:

• os nad ydych yn berchen ar gar ond mae angen un arnoch o bryd i'w gilydd

• os ydych eisiau rhoi'r gorau i ail gar nad yw'n cael ei ddefnyddio yn aml

• os oes angen car ar gyfer gwaith achlysurol neu deithiau teuluol

• os ydych eisiau rhoi cynnig ar yrru car trydan cyn prynu un

• os ydych yn rhedeg busnes neu sefydliad nid-er elw sydd ond angen cerbyd ar adegau penodol

Gall clybiau ceir fod yn arbennig o ddefnyddiol mewn cymunedau gwledig, lle efallai na fydd bysiau a threnau ar gael pan fydd angen i chi deithio, neu nad ydynt yn gallu darparu gwasanaeth ar gyfer y daith gyfan.

Sut mae clwb ceir trydan TrydaNi yn gweithio?

Mae ymuno â TrydaNi a defnyddio un o geir y clwb yn syml:

1. Gwnewch gais i ymuno â'ch clwb ceir agosaf trwy wefan TrydaNi.

2. Lawrlwythwch yr ap unwaith y bydd eich cais wedi'i gymeradwyo.

3. Defnyddiwch yr ap i ddod o hyd i gar trydan sydd ar gael a'i archebu.

4. Bydd angen ichi ddatgloi'r car gan ddefnyddio'ch ffôn.

5. Dychwelwch y car i'w leoliad cartref ar ddiwedd eich trefniant, yn barod i'w ailwefru ar gyfer y person nesaf. Ewch â'ch holl sbwriel gyda chi a gadael y car yn lân ac yn daclus.

Mae ceisiadau fel arfer yn cael eu cymeradwyo o fewn diwrnod, er y gall gwiriadau yswiriant gymryd hyd at dri diwrnod gwaith.

Ar ôl i chi ymuno â'ch clwb lleol, gallwch ddefnyddio unrhyw gerbyd TrydaNi sydd ar gael ar draws ei rwydwaith.

Faint mae’n costio?

Ar hyn o bryd mae ceir TrydaNi yn costio:

• £2 yr awr

• Uchafswm tâl amser o £30 am bob cyfnod o 24 awr

• 16c y filltir am y 100 milltir cyntaf

Mae trydan wedi'i gynnwys ar gyfer y 100 milltir cyntaf. Os oes angen ichi wefru'r car yn rhywle arall yn ystod taith hirach, bydd angen i chi dalu am hynny.

Er enghraifft, byddai archebu car am ddwy awr a gyrru 40 milltir yn costio £10.40:

• Dwy awr: £4

• Deugain milltir: £6.40

• Cyfanswm: £10.40

Mae busnesau'n talu ffi cyfrif misol o £15, tra bo sefydliadau nid-er-elw yn talu £10 y mis. Yna codir tâl am ddefnyddio'r cerbyd ar y gyfradd safonol.

Mae gan TrydaNi gyfrifiannell prisiau ar ei wefan i helpu pobl i gyfrifo cost debygol taith.

Ble mae clybiau ceir TrydaNi yng Nghymru?

Ar hyn o bryd mae TrydaNi yn rhestru clybiau ceir mewn 13 lleoliad ledled Cymru:

• Aberystwyth

• Y Fenni

• Bangor

• Bethesda

• Llandeilo

• Llandrindod

• Llanidloes

• Llansteffan

• Llanymddyfri

• Machynlleth

• Pen-y-groes

• Penrhyn-coch

• Abertawe

Mae clybiau newydd wedi agor yn Abertawe, Pen-y-groes a'r Fenni yn ystod 2026.

Os nad oes clwb ceir trydan yn eich ardal chi, gall eich cymuned gofrestru ei diddordeb mewn dechrau clwb drwy wefan TrydaNi.

Sut brofiad yw defnyddio clwb ceir trydan?

Lansiwyd clwb ceir TrydaNi Aberystwyth ym mis Rhagfyr 2024 ac mae eisoes ganddo 99 o aelodau.

Mae'r aelodau'n rhannu dau gerbyd trydan: Vauxhall Combo Life Electric a Renault Zoe, y ddau wedi'u lleoli ym maes parcio Heol y Gogledd.

Dywedodd Simon LePine, aelod o glwb Aberystwyth, ei fod wedi rhoi mynediad iddo ef a'i wraig i gar heb y gost a'r cyfrifoldeb o fod yn berchen ar un.

"Dyw fy ngwraig a minnau ddim wedi bod yn berchen ar gar ers o leiaf 15 mlynedd, felly y car yw ein hunig gyfle i ddefnyddio cerbyd. Mae'n caniatáu inni ddefnyddio car pan fydd angen un arnon ni heb boeni am barcio, yswiriant a'r holl bethau eraill hynny pan nad oes angen y car."

Gall aelodau hefyd ymuno â grŵp WhatsApp dewisol i rannu cyngor a gwybodaeth leol. Mae cymorth dros y ffon ar gael rhwng 8am a 10pm, saith diwrnod yr wythnos.

Gall pobl sydd eisiau cymryd mwy o ran wirfoddoli fel Eiriolwyr Cymunedol. Maen nhw'n helpu i wirio a glanhau'r ceir ac yn derbyn credydau gyrru yn gyfnewid am eu hamser.

Dim ond y dechrau yw hyn...

Mae TrydaNi yn cael ei gefnogi gan £1 miliwn o gyllid gan Lywodraeth Cymru, gan helpu'r rhwydwaith sy'n eiddo i'r gymuned i ddarparu trafnidiaeth fforddiadwy, di-allyriadau mewn mwy o rannau o Gymru.

Ymwelodd y Dirprwy Weinidog dros Drafnidiaeth Mark Hooper â chlwb Aberystwyth i weld sut mae'r cyllid yn helpu cymunedau lleol.

Dywedodd:

"Mae clybiau ceir yn ffordd hawdd a fforddiadwy i bobl rannu car heb y costau sydd ynghlwm wrth fod yn berchen ar un. Dw i mor falch o weld bod y cynllun yn ehangu."

Ychwanegodd y gallai clybiau ceir trydan helpu pobl i roi'r gorau i gar neu ail gerbyd tra'n cynnig ffordd o brofi gyrru cerbyd trydan heb wneud ymrwymiad hirdymor.

Sut gall clybiau ceir trydan helpu Cymru?

Mae clwb ceir trydan yn rhoi opsiwn arall i bobl: mynediad at gar pan fydd angen un, heb orfod bod yn berchen ar un.

Gall defnyddio cerbyd clwb ceir olygu bod pobl yn gallu arbed arian drwy gael gwared ar geir nad ydynt yn cael eu defnyddio y rhan fwyaf o'r amser.

Mae clybiau ceir yn rhoi cyfle i fwy o bobl deithio mewn cerbyd trydan. Gall hyn helpu i leihau allyriadau trafnidiaeth a chefnogi Cymru lanach ac iachach.

Dewch o hyd i glwb ceir trydan yn eich ardal chi

Os hoffech geisio gyrru car trydan heb brynu un, ewch i wefan TrydaNi i:

• Ddod o hyd i'ch clwb ceir trydan agosaf

• Gweld pa gerbydau sydd ar gael

• Cyfrifo cost taith

• Gwneud cais i ddod yn aelod

• Cofrestru diddordeb mewn dod â chlwb i'ch cymuned

Cwestiynau cyffredin

A yw TrydaNi ar gyfer pobl nad ydynt yn berchen ar gar yn unig?

Na. Nid yw rhai aelodau yn berchen ar gerbyd, tra bod eraill yn defnyddio TrydaNi yn lle rhedeg ail gar neu ar gyfer teithiau pan nad yw eu cerbyd eu hunain ar gael.

A all busnesau ac elusennau ddefnyddio TrydaNi?

Gallant. Mae TrydaNi yn agored i unigolion, busnesau a sefydliadau nid-er-elw. Mae ffioedd cyfrif misol ar wahân yn berthnasol i gyfrifon busnes ac nid-er-elw.

Oes angen i mi fod oed penodol i ymuno?

Oes. Ar hyn o bryd ni all TrydaNi dderbyn gyrwyr o dan 25 oed neu bobl 80 oed a hŷn oherwydd eu gofynion yswiriant.

Oes angen ffôn clyfar arnaf?

Mae ceir fel arfer yn cael eu harchebu a'u datgloi drwy ap TrydaNi. Dywed TrydaNi y gall hefyd helpu pobl nad oes ganddynt ffôn clyfar i gael mynediad i'r gwasanaeth.

A yw gwefru wedi'i gynnwys?

Mae trydan wedi'i gynnwys ar gyfer 100 milltir cyntaf archeb. Efallai y bydd angen i chi dalu os byddwch chi'n gwefru'r car yn rhywle arall yn ystod taith hirach.

A allaf ddefnyddio car TrydaNi o glwb arall?

Gallwch. Ar ôl ichi ddod yn aelod, gallwch archebu cerbydau sydd ar gael ar draws rhwydwaith TrydaNi.

A all fy nghymuned wneud cais am ei chlwb ceir trydan ei hun?

Gall. Gall unigolion, cynghorau tref, mentrau cymdeithasol a sefydliadau cymunedol eraill gofrestru eu diddordeb gyda TrydaNi.

Chwilio am ragor o gyngor ar gerbydau trydan?

Oes gennych chi ddiddordeb mewn cerbydau trydan? Dysgwch fwy am y manteision neu edrychwch ar ganllaw Autotrader ar brynu car trydan ail-law.